Mamallaktapa pushakka maykanpash anarquía wiñachinkapak munakpika wichkaywasipi tukurinka nirka; shinapash Conaie tantanakuyka Leonidas Izata wañuchinkapak nikun hamutashka.
Facebook pankapika, Guillermo Lasso, Leonidas Izata shinallatak Angel Tipantuñata wañuchinkapak nikun nishpa llukchishka. Chay willayka umachinkapakmi kan. Chay willayka Lasso “wichkaywasipi tullukunawan anarquistamanta tukurinkiman”nikpimi chay willayta llukchishka. Shinapash wichkaywasimanta nirka, Conaie tantanakuyka wañuchinkapak nikun nishpami hamutarishka.
Lasso mamallaktapa pushak shuk tapuykutichipi “Encontrémonos por la ciudadanía” nishkapi, 21 kapak killapi 2021 watapi, Leonidas Izamanta rimarka; llakichik runa, warmikunata llakichik kan nirka.
Shinallatak kamaywasikunata rupachik, chapakunata, willachikkunata, Quitotapash wakllichirka nirka. Chaymi, Mamallaktapa kamachiwan rikunka nirka. Anarquista shinallatak “mana democraciata allikachik” kan nirka. Maykanpash anarquía nishkata wiñachinkapak munakpi “wichkaywasipi tullukunawan tukurinka” shina nishpami rimayta tukuchirka.
Conaie tantanakuymi chay nishkata kutichirka shinallatak Leonidas Izapa kawsay llaki apakpika Mamallakta pushakpa huchami kanka nirka. Shinallatak kamachiktapash nishkakunatapash rikunka.
Shinallatak, Ángel Tipantuña Lassomanta rimarka shuk kuyukshuyuta ruraka “mamallaktapi dictadura” kan nishpa. Shinapash, Tipantuña wañuchikrin nishpa mana imatapash huchachirkachu.
