COE tantanakuymi Covid-19 llaki unkuypachamanta wakin mañaykunata kapak killamanta churarka. Wakin kuskakunaman yaykunkapakka vacunashkamanta pankata rikuchishpa yaykuchun.
Facebook pankapi shuk willayta yallichinakun Guillermo Lassopa rikchata churashpa shinallatak kay yuyayta kimichishpa:” Vacunarishkamanta pankatami katunawasikunapi mañana”. Chay rikchapika Mamallaktapa pushak tukuy mamallaktapi chay pankata mañashun nishpa willachishka nin.
Chay willayka mana achiklla kanchu. Wakin kuskakunapi chay vacunarishkamanta pankata yaykunkapak rikuchichun mañarkami shinapash shuk pushakkuna shina nirka, mana Mamallaktapa pushak nishkachu. 21 kapak killapi 2021 watapi, Hampi kamaywasimanta willachirkami vacunarishkamanta pankata wakin kuskakunaman yaykunapak rikuchichun.
Chay mañaykunaka COE tantankuymi churarka, Covid-19 unkushkakuna tiyakpi, shinallatak ómicron mushuk unkuy rikurikpi.
Juan Zapata, COE tantanakuypa pushakka, wakin mañaykunamanta nirka: 50% runakunallata mikuna ukukunapi tiyachun, apunchikwasikunapi, katuna kuskakunapi, kuyukshuyu rikuchikkunapipash nirka.
Katunawasikunapi, katunapampakunapi, kullkikamaywasikunapi shinallatak kamaywasikunapipash 75% runakama tiyata ushan.
“Hampi kamaywasikunamanta pushakkkuna mañaykunataka churan shinallatak maykan kuskakunaman yaykushpaka vacunarishkamanta pankata rikuchishpa yaykuchun. Kay vacunarishkamanta pankaka hampiwasikunapi, yachaykunapika mana mutsurishka kanchu”, imashina COE tantanakuykun nikun. 4 panchi killapi 2022 watapi, Quitomanta katukkunapa tantankuy twitter pankapi churarka vacunarishkamanta panka chay kuskaman yaykunkapak mutsurishka kakta.
