Varicela unkuyka llakichita ushanmi shinallatak maykanpash unkurita ushanmi. Vacunakunami unkuymanta harkan.
Tik tok pankapi shuk kuyukshuyuta yallichinakurka chaypimi shuk runa mana vacunata churakukrinchu nikun. Chay kuyukshupika “ varicela unkuypak vacunata churarikpimi 1796 watapi tukuylla wañurka”nishpa.
Chay kuyukshuyuka 310 waranka runakunami rikushka, 6.919 allikachishka shinallatak 1700 killkashka. Chay kuyukshuyupika wakin runakunaka asin, tukuy runakuna chay watamanta wanushka nikpi, mana vacunamanta nishpallatak.
Chay nishkatami 170 kuyukshuyukunapi churashka 2021 watapi, añawllawtupa llulla willaykunata yallichinkapak hapishka. Kunanka, chay pankaka 3.5 hunu runakunami katinakun, shinapash chay willayka llullami kan.
Varicela unkuypak vacunapa ñawparimay
Varicela unkuypak vacunaka mana 1796 watapi rurarirkachu, imashina chay kuyukshuyupi nikun. Kipa watakunapimi rurarirka. Michiaki Takahashi llamkarka chay taripayta rurashpa. 1964, Hustonman rirka, Texasman maypi paypa churi unkurirka. Chaymantami, 1965 watapi, Japonman tikrashpaka vacunata rurankapak kallarirka. 1972 watapimi taripaykunata kallarirka. Chay watami, Japónpi shinallatak shuk mamallaktakunapipash vacunashpa kallarirka. Shinapash, FDA kamaywasika 1965 watapi manarak arinirkachu, mana yapa pacha charikpi. OMS tantanakuyka, varicela unkuypakka kawsak añawmanta varicela- zóster vacunata ruran nin.
Varicela unkuypak vacuna shinallatak covid-19 unkuypak vacuna
Daniel Simancas, unkuykunamanta yachayukka kuyukshuyumantaka nin “asichinkapakkan, shinallatak mana wañuykunawan rikuyta charinchu. Hampipa ruraykunaka runakunapa alli kakta rikun”.
Simanka ashtawanpash nin “vacunakunaka kawsaypakmi yanapan mana wañuchinchu, yachayukkunami ima llakikuna tiyakpika willachinchikman”.
Unicefka, vacunakunaka hampi taripaykunamanta kan, shinami unkuykunata harkankapak. Shinallatak shuk chinikupi 5 hunu wawsayta kaman. Covid-19 unkuy manarak tiyakpika vacunakuna shuk watapi 3 hunu wañuykunata harkak karka.
