Modernaka 6 killamanta 5 wata charik wawakunapak vacunata arinichunmi mañakun
FDA hampi ruraktami arinichun mañarka. Vacunaka ishaky kutin 25mg churanka nirka. CDC kamaywasika wawakuna shinallatak wamprakuna mashna wata charishpapash covid-19 unkuywan unkuyta usharinmi nin. Shinallatak vacunakunaka añawllawtu unkuymanta harkanmi shinallatak ama yapata unkuchun, ama wañuchunpash yanapanmi nin.
Twitter pankapi shuk willayta llukchirka, Modernapa willaykunamantaka 51% chay vacunaka Covid-19 unkuypak 6 killamanta 2 wata charik wawakunapak alli kan shinallatak 2 watamanta 5 watakaman charik wawakunapak 37% ama ima nanaykunata charichun kan. Chay willayka shinami kan.
CNN shinallatak Infobae willachi tantanakuykunaka FDA Moderna vacunakunata arinichunmi maskakun, chay vacunaka 6 killamanta 5 watakama charikkunapakmi kan.
Modernaka hampikunamanta pawkar tukuri killapi 2.500 wawakunawan 6 shinallatak 24 killa watayuk wawakunawan taripaykunata rurarkami shinallatak 2 watamanta 5 watakama charik 4.200 wawakunawanpash taripayta rurashka. Chay hampi rurakka ishaky kutin 25mg churashpami unkuyta harkan nirka.
mRNA-1273ka wawakunata SARS-CoV-2 unkuymanta harkayta ushanmi yuyanchik, ashtawanka covid-19 unkuyta harkankapak munanchik, shinallami taytakunapak kamakkunapakpash alli kan”, Stéphane Bancel Modernapa pushak nirka.
“Vacunakunaka unkuymanta harkanmi. Pachakuna yallikpika kutin vacunata mutsunkami. Shinapash chaypak llamkakunchikmi”, Paúl Burton Modernapa hampik nirka.
