Kay hunkaypi Yachaymanta Covidmanta rimaypika imashinatak kay unkuy pachata harkayta ushanamanta rimarkanchik. Kay pachakamanka Ecuadorpika 156.451 unkushkakuna tiyan. 39 punchakuna yallishka tukuykuna llukshita ushanmi nishkamanta. Shinapash kay llaki unkuy pachaka manarak tukurinchu, hampipash manarak tiyanchu. Chaymantami nin ñakutin wañuykuna, unkushkakuna mirayta ushanmi.
Imatatak rurana kanchik ama unkunkapak, shinallatak unkushkakuna ama mirashpa richun, Jorge Hermida, Mabel Sanchez, shinallatak Luis Vidal hampikunami kay rimanakuykunapi karka.
Kallarinkapakka, yuyarina kan imashinatak kallarimanta kay unkuypacha kashkata. Chaypimi Jorge Hermida hampik nin, Guayaquilpi kallaripi, aymuray (mayo) killapi ashtawan unkushkakuna mirarka, shinapash hampina wasikunaka mana tukuyta paktachirkachu.
Hampikkunapash manarak tukuyta unkuymanta yacharkanchikchu, nirka. Shinapash kipaka, aymura, raymi killakunapika Sierra markakunapimi unkushkakuna mirashpa rirka. Ashtawanpash, Guayaquil llaktawan rikushpaka, chaypimi ashtawan llaki aparka, ashtawan unkushkakuna, wañushkakunapash tiyarka. Kay ishkay hunkaykunapi mirakun kay Sierra markakunapi, nirka.
Kay shamuk killapi, samana pachakunapash shamukun (feriado). Mana shuk kakkrinchu, runakuna ña shaykushka wasipilla wichashka kashkamanta, shinapash ashtawan llukshinakun, manchaypash sakishka, shinapash yuyarina kan kay unkuy tiyanrami, shimi killparinata churakushpa llukshina, karu karulla kashpa, makita allitapacha mayllashpa katina, nirka Luis Vidal hampik.
