OMS tantanakuymantaka chay ishkay unkuywan unkurita usharinmi nirka. Shinapash mana mushuk covid unkuy kanchu.
Facebook pankapi shuk willayta llukchirka Israelpi Fluronawan shuk unkushkata tarishka nishpa. Chayka uhu unkuy shinallatak covid-19 unkushka kan. Shinapash chay killkaypillatak nikun mushuk unkuy Flurona shuti kakta. Shinapash yachayukkunaka ninmi Flurona unkuyta tarirkami shinapash mana mushuk añaw kanchu. Ishkay unkuykuna chapurishka kan, nirka.
El Comercio willachi pankapash 2 panchi killapi 2022 watapi, Israelpi Fluronawan shuk unkushkata tarishka, shinallatak Españapash Cataluñapi 3 unkushkakuna tiyan nishpa willachirka.
Flurona shutita churashka uhu unkuy shinallatak covidwan chapurikpi. Chay ishkay unkuywan unkurikpimi kan. Israelmanta yachayukkunaka mana mushuk covid kanchu nirka.
Times of Israel nirkami, chay unkuytaka shuk wiksayu warmipimi tarishka shinapash mana vacunarishka kashka nirka. Chay warmika 30 kapak killa hampina wasimanta llukshirka.
Flurona shutika Flu ingles shimimanta kan uhu shinallatak rona shimika coronavirusmanta shamun, shinami Mundo de España pankapi willachirka. Shinapash unkuypachakunapika shina unkuykunamantapash wañuykuna tiyanmi nin.
“Chay unkushkaka ishkay añawta charishka, covid-19 unkuy shinallatak uhu unkuyta charishka. Chay ishkay añawkuna kayta ushanmi shina unkuchinkapak. Chay unkuykuna chapurikpika mana alli kanchu, ashtawan sinchi kayta ushanmi”, nirka Víctor Álvarez, Pichincha Hampikkunapa pushakka.
